Лансирана дигиталната платформа „Алијанси за ЕУ“: Знаење, добри примери и модели на дијалог за сличн

Проектот „Алијанси за ЕУ“ го спроведува Институт за општествени и хуманистички науки од Скопје, во партнерство со Словачката академија за науки, Фондацијата за хуманистички и општествени истражувања – Софија, Res Publica Фондација – Варшава, Институт за модерен развој – Прага и Институт за политичка историја – соопштуваат од Институтот во Скопје.

„После проектите со генерално заглавие Авении на соработката (поддржани од Меѓународниот Вишеградски фонд, и од Балканскиот фонд за соработка-USAID) спроведени во текот на 2021-2022, Институтот заедно со речиси истиот тим на истражувачи и организации спроведува нов проект на културно помирување меѓу македонското и бугарското општество“, пишува во соопштението.

Целта на проектот е да понуди знаење, добри примери и модели на дијалог за слични спорови ширум Европа. Проектот нуди конструктивна алтернатива за „големите историски спорови“ и не навлегува во анализи на политики на општествено-политичките поларизации кои се присутни на повеќе фронтови поврзани со бугарско-македонскиот културно-идентитетски (или, како што некои го нарекуваат, историски) спор.

„Целта е да ги испитаме можностите и да ги промовираме вредностите на дијалог меѓу двете поларизирани општества, вклучувајќи го овде и бугарското малцинство во Македонија, учејќи од Германија, Полска, Унгарија, Словачка и бројни други земји во Европа“, изјавија од Институтот за ЦИВИЛ Медиа.

Платформата овозможува увид во тоа дека овој спор (македонско-бугарскиот) не е исклучок, туку е честа појава во Европа, но и дека добрите модели на дијалози можеле да траат и со децении, паралелно со евро-интеграциските процеси. За ова зборува в.д. Амбасадорот на Германија во С. Македонија, господинот Ото Граф, во интервјуто изведено во ко-продукција со ЦИВИЛ Медиа.

Од Институтот потсетуваат дека „на линкот ПОДКАСТИ може да се погледнат други релевантни интервјуа, а за студиите објавувани во рамки на овој проект, следете ја платформата „Алијанси за ЕУ“.

Институтот за општествени и хуманистички науки отвори и онлајн линк каде што граѓанките и граѓаните имаат можност да изнесат свои предлози за подобрување на добрососедските односи на нашата земја со соседите.

Џ. Д.

Извор: Civil Media https://civilmedia.mk/lansirana-digitalnata-platforma-alijansi-za-eu-znaene-dobri-primeri-i-modeli-na-dijalog-za-slichni-sporovi-shirum-evropa/